Met:
Een woord verof
Hierunder vin ie zaoken die as te maoken hebt met de oetzending van Hemmeltied vanoet Grol. Hemmeltied is 't zaoterdagmörgenprogramma van Radio Drenthe van 10 tot 12 uur. Dizze keer presenteert deur Hennie Kuijer en Lo Dijkstra. Tiedens de veurbereidings heb ik vaok in contact staon met Elly Smit. Elly is verantwoordelijk veur de regie van 't programma. Elly nog bedankt heur, 't was mooi. Maor ok een woord van dank an Roelie Reinders, Wiebe Bijker en Henk Zeelenberg. Zij hebt methöpen um 't programma te vullen. En daornaost bin ik bliede dat elk en ien die wij vraogt hebt ok votdaolijk met an wollen doen.
Foto's kieken
Een selectie van de foto's, maokt tiedens Hemmeltied in Grol't Gedicht
Hemmeltied, 23 december 2006, in GrolGrol, de bakermat van de Drèntse blues en Rock & RollBertus Reinders, 16 december 2006, veur Grol
Hoe is 'n rustig esdörp, midden in't Drèntse laand
In de wereld van de meziek - in dizze vörm - belaand
Een dörp waor aait zoveul te doen is, as ik deur de agenda dool
Een Boermarke is er al hiel lang
Al is de functie behoorlijk veraanderd de lèste tied
Wij bint hiel bliede dat dizze organisaotie nog bestiet
En graog herinner ik je an't wezenlijk belang
Teneelspeulen hebt ze hier ok aait veul daon
De Plattelandsvrouwen, de meziek- en zangverening, elk har zien teneelgroep
Daornaost ha'j de beide teneelverenings; die doet ok op 't publiek een beroep
Jao, in de wintermaonden ku`j elke aovend wel argens hen gaon
De Plattelandsvrouwen bint net ophollen te bestaon
De meziek en zang doet op heur opvoerings now meziek en zang
De teneelverenings speult gewoon teneel en hopelijk nog hiel lang
Grol is met dizze verenings hiel arg begaon
De sport mug wij vanzölfs niet vergeten
Voetbal, volleybal, hardlopen of gymnastiek
SGO dient mienigien van repliek
Bestuurlijk gelukkig oet 't zwaore weer, laot ze elk lid goed zweten
Een moterclub is hier ok te vinden
Met "Home Base Grolloo" as naom
Komt hiel wat moterliefhebbers tesaom
As club misschien nog wel 't miest met Blues en Rock & Roll te binden
De Verening veur Volksvermaoken telt ok beslist met
't Neutieschieten met Paosen, een fietstocht of 't summerfeest
't Volk vermaoken is aait de bedoeling weest
Veur elke activiteit wordt hiel wat wark oet `t stro zet
De klimaotveraandering gef ok in Grol problemen de lèste tied
Het Evenveen, oeze iesverening, mist de lèste jaoren 't ies
Deur `n bijdrage veur 't schoelscheuveln steunt ze now 't scheuvelunderwies
Maor hopen doet ze nog aait dat ze met de scheuvels over 't eigen natuuries glied
Je hiele leven bi'j in Grol under de pannen
Van Peuterspeulzaol tot jeugdsoos, van 55-plussers tot begrafenisverening
Met elkaor hol wij 't veurmekaor en dat met overtuging
Een tomeloze inzet deur veule vrouwen en mannen
Zunder vrijwilligers stiet alles stil
Ok in Grol en umstreken kom ie vaok de zelfde mènsen tegen
En dizze mènsen bint veur 't vereningsleven een zegen
Waordering veur dizze belangeloze inzet, is waor ik zwaor an til
Naotuurlijk moet wij de donateurs en leden niet vergeten
Bijna iedere inwoner steunt de verenings allemaol
De betrökkenheid bij aal dit moois is bijnao totaol
Zunder dizze gemienschapszin hadden wij hier niet zeten
Elk en ien kan hier in Grol terecht
Van vliegenier tot coureur, van scheuvelloper tot fluitenbouwer
Maor ok de alternatieve genezer of de beeldhouwer
Acceptaotie veur mienigien, dat is waor wij veur vecht
Artiesten van boeten of oet eigen kweek
As old buren van de gebroeders Harteveld
Herinner ik mij 't muzikaole geweld
Erik dicht now in Assen bijna elke week
Met "Child of Nature" gung Henk Lanting veur de top
Now heur wij bij Radio Drenthe Henk in 't Drènts zingen
Over gevulige, maor ok over de gewone dingen
Zien "Wat is't weer drok in Grol", waorvan 't underwarp reacties oprop
Harry Muskee ku'w nog daogelijks zien
Met "The window of my eyes" en Groeten uit Grollo" as golden oldies
Bin wij met zien börstbeeld best wel wies
In Grol zeg wij: "Kiek, daor stiet Harry op ien bien"
Wij moet vanzölf ok Egbert Meijers numen
Veul van zien liedties zie wij zo veur oeze ogen
De iene giet je an 't hart, van de aander wo`j opgetogen
Da'w bliede bint da'j hier optreden wult, wul wij zeker niet verzumen
Met liedties over 't Aomerdiepie en de es
Zingt de zangers van tieden, waor de boeren zich now drok um maokt
Ontgunnen en verkaoveld, terug naor 't olle, waor heb wij verzaokt
De economische hang naor vrogger, naor hei en jeneverbes
Met alles wat wij hier zegt hebt, bin wij der nog niet
Want met een kerk, een schoel, een dörpshoes en een rume middenstand
En a'j lekker eten wult, de keuze oet de iene of 't aandere restaurant
Döt 't gebrek aan meuglijkheden veur sociale woningbouw oes veul verdriet
Ien verening is nog niet nuumd; Dörpsbelangen komp op veur Grol
De gemiente laot oes, wat dat betreft in de steek
Wij kunt roepen wa 'w wult, der wordt gewoon niet luustert naor oeze preek
Maor dan is zölfs bij oes in Grol de maot behoorlijk vol!
't Verslag van een gezellige mörgen
Het is weer drok in Grol en dat al um een uur of zeuven. De vrachtwaogen van RTV-Drenthe rolt Grol binnen. Eem laoter rolt technische mènsen de eerste kaobels oet. De grote zaol van Hofsteenge wordt in gereedheid braacht. Um kwart veur negen kom ik bij de zaol an, geliek met Jan Harbers. "Bin ik te vrog?" De zang- en de meziekverening zulen um kwart over negen, half tien anwezig wezen veur een 'sound-check'. In de zaol lop Hennie Kuijer al, samen met Martin Föller, de techneut. Eem een haand geven en welkom heten in Grol vanzölfs. Der schient ok nog een dame in de vrachtwaogen te zitten, maor die zie of heur ie niet. Da's wa'j nuumt echt achter de schermen. Ik nim met Hennie 't programma deur. Eem laoter komp ok Lo Dijkstra der bij. As Erik Eefting an de beurt is mot 't toch veural gaon over heur bedrief met betrekking tot Grol en niet over de periekelen bij de grote Moere, want daor zit gienien op te wachten. En oh jao, Henk Lanting komp ok. Hij zal't hebben over Child of Nature. Veur de rest gien biezunders of 't mot al wezen dat de schoel net eem te wiet vot is veur 't vraoggesprek met Anja Gerding. Maor dit wordt van te veuren eem oettest. Inmiddels bint er al aordig wat leden van de meziek en de zang. De sound-check kan dolkies begunnen. Egbert Meijers is inmiddels ok arriveerd. Ik was slim bliede dat Egbert kommen wol. Wij mussen zörgen dat de zaol rookvrij was, want rook, daor kan Egbert niet over. In elk geval kan e dan niet zingen en da's now ja krek waor as ik der naor vraogt har. Egbert wordt begeleid deur organist/accorionnist Kees Hendriks. Zij installeert zuch eem op 't podium en repeteert ok wat.
't Hemmelrek wordt in mekaor zet. En drei personen van de zang en van de meziek wordt eem oetlegd hoe 't spel "Gaar bij mekaar" in zien wark giet. Veur de zang bint dat Wiebe Bijker, Joke Vinke en Jannie Lesschen en veur de meziek Roelie Reinders, Helena Hofsteenge en Jan Reinders.
Dan is't zo wiet, 't Is tien uur west en we gaot lös. Egbert Meijers mag begunnen, naodat de beide striedende verenings op pad stuurt bint. Een kört interviewgie en dan 't eerste liedtie. Grol december, een nummer van zien leste CD. 't Past naotuurlijk mooi bij dizzedaogen veur de kerst.
Anja Gerding mag wat vertellen over de schoel, de verbouw of beter zegt anbouw, want deur een gestaoge anwas van kinder mot der een klaslokaol bijkommen. Op de vraog van Hennie dat de straoten in Grol toch wel hiel aans loopt dan vrogger, wus Anja gient antwoord te geven. Wat wij de grote weg nuumt, was der vrogger vanzölfs niet, maor da's ok wel hiel lang leden.
De eerste dames en heren in galakleding komt binnen. Dat wul zeggen dat de eerste opdracht veur beide verenings der bijnao opzit. De zang wint dizze eerste opdracht. Maor kört daorop zie wij ok veur de meziek hiel wat mensen in kostuum. En zo giet 't deur, de iene nao de aandere opdracht wordt ofwarkt.
Dan is't woord an Henk Zeelenberg. Henk vertelt Lo waoras de teneelverening TOG naor op zuuk is. Een lange jaeger underboks, een kanariepietje en een paor kunstgebitten moet der kommen. Wel een beetie jammer dat Harm vandaog vervangen is deur Lo. Aans niet hor, maor Harm hef 't stuk schreven waor Henk de attributen veur vrag. Maor goed, tot now an toe is der nog gien reactie op kommen en 't is now oldjaorsdag dat ik dit schrief.
Met de neus veuran is het volgende punt op het dreiboek. En wel is dat…..juust jao, Bertus Reinders. Hennie nuumt zo is wat verenings op waoras ik bij betrökken bin. 't Bint der genog, maor ik krieg de kaans um Grolloo Totaal nog ies weer under de aandaacht te bringen. Een geslaogd project, waor ik slim wies met bin. De aandere dingen komt ok in 't gedicht naor veuren.
Egbert Streuer har ik niet op mien liestie staon, maor dat zal wel eem overlegd wezen. Komp vanzölfs ok goed oet, want meteen week wordt veur 't eerst de speedshow holden en daor kun e now mooi eem wat reclaome veur maoken. Geliek hef e naotuurlijk. En inmiddels weet wij dat de speedshow een groot succes worden is. Hiel Grol stun vol met auto's.
Nao een lied van Egbert over het wonder, gaot de microfoon naor Henk Lanting. Een blik terug in de tied. Child of Nature was de band van Henk in de jaoren 60-70. In 't gesprek met Lo weur terugblikt naor die tied. De belevenissen en hoe 't der heer gung. Ik har Henk veur die tied zegt da'k der nog aait an denken mus hoe mien vao, toen der tied veurzitter van de VvV, zien band ankondigen wol tiedens het muzikaal onthaal. 't Engels gung niet, dus weur 't Kind van de Natuur en mus Henk 't zelf maor in 't Engels zeggen. Maor goed, 't interview weur ofsleuten en daornao kunnen wij nog eem luusteren naor een stukkie meziek van Child of Nature.
As inwoner met een biezunder beroep hadden wij Jan Postema opgeven. Jan kun nog ies oet de doeken doen wat een directeur van De Blauwe Stad zoaal döt. Een beetie extra publiciteit kunt ze goed gebruken en Jan kan der mooi over vertellen. Veur oes in Grol is Jan ok veurzitter van 't projectenfonds van de Rabobank en da's veur de verenings ok belangriek. Daor wul ie 't veur de radio niet over hebben, maor da's wel waorum wij an Jan daacht hadden um hem hierveur te neugen.
Dan weer meziek van Egbert over de blues en dizze keer in't Engels. 't Publiek wet 't te waarderen en een applaus is dan ok op zien plaots.
Hennie was undertussen met Gert van deer Zande naor de kerk toe lopen. En daor ku'j Gert enhousiast heuren praoten over de kerk en met naome over de kerkklok. Een mooi verhaol en vertelt deur iene die as dat zo mooi kan. De klok weur trouwens luud deur Sandra Moek, die underweg was naor 't café met vingerhoeden veur Crescendo. Hennie har de regie deurgeven dat ze dizze wel met mussen tellen, maor dat Sandra gien tied har um naar de kroeg te kommen. Hennie wet now in elks geval waor as in Grol de klepel hangt en met een ofslutende kerstwens van Gert zat ok dit mooie underwarp der op.
Daorna de opdracht veur Grol. Maok een lied, een veurdracht, schetsie of wat dan ok met de beguntekst "Grol, de bakermat van de Drèntse blues en Rock & Roll" en de eindtekst "Maor dan is zölfs bij oes in Grol de maot behoorlijk vol!". Dizze riegels wordt aait bekent maokt een week veurafgaand an de oetzending. Ik zat dan ok met pen en papier klaor en bin daornao an de gang gaon. Zundagsaovends ha'k 't klaor en he'k 't eem mailt naor Henk Zeelenberg. Een paor opmarkings van Henk he'k nog eem verwarkt en klaor was't. 't Zul mooi wezen um 't met zien beiden te doen, maor Henk en drènts dat giet niet goed. Een vrouwspersoon en dan ofwisselend een paor riegels veurlezen. 'k Heb dat in hoes eem prebeerd, maor dat valt niet met um een aander 't drènts te laoten oplezen zoas ik dat schreven har. Waorum doe'j 't niet allennig. Now, umdat 't dan wel arg veul Bertus Reinders wordt, zee ik. Maor goed, ik had 't ok maokt, dus was dat 't makkelijkst. 't Mus binnen de vief minuten en op vieftien seconden nao he'k die vief minuten ok vol maokt. 't Gedicht weur arg waardeerd.
Hennie was in tied de keuken in gaon en hef daor met de kok 't kerstmenu eem deurlopen. Daor stroomt je 't waoter van in de mond en met 't stoofpottie ter ofsluting gung 't op Lo an. Die har Erik Eefting naost zich zitten. Erik en Lo kenden mekaor van de tied dat Erik nog in Nei-Baoling woonde. Erik was oetneugt as nei Groller in plaots van as nei Drent. Der is wel vaoker is een interview west met Erik veur Radio Drenthe, maor dat gung dan aait over de problemen rond de grote Moere. Dizze keer har hij de kaans um over Joytime te vertellen en over de oetbreidingsplannen. Positief in't neis, dat wol e graog een keer en hij hef der goed gebruuk van maokt. Ik bin bliede da'w hem op de liest zet hebt.
't Spel "Gaar bij mekaar" zit der op. Eigelieks al lang, maor dat gef niks. De zagvereniging hef verloren, maor ok dat gef niks. Wiebe zee hierop dat ze niet verloren hadden, maor dat ze zilver hadden wönnen. En Roelie was der slim bliede met en bedankte de inwoners veur de metwarking. Zij mug de check van honderd euro in ontvangst nimmen. Een mooi detail is dat we van te veuren ofspreuken hadden dat dit bedrag dielt zuul worden deur de beide verenings. Gef niks, de stried was der niet minder um. Raore kapriolen bint der oethaold. Iene daorvan ku'j tussen de foto's zien. Een linnerik op 't dak van een autogie, vastholden deur de inzittenden en dan met een rötgang deur Grol. Alles kun.
De hiele zaol zingt met as Egbert Meijers vervolgens Daanskerels ten gehore bringt. Daansles in Grol, in't café van Haarm Hofstee. Zölf he'k dat ok had en 't gung precies zo as dat hij der over zingt. Haarm is al lang oet de tied en Grietje, die ok in de zaol zat, kreeg 't der slim stoer met. 't Is dan ok veur zoveul mensen hiel arg herkenbaor.
As leste een optreden van Crescendo en Vriendekring, maor ok met Egbert, met 't mooie lied Grolloo. Hoe kan't mooier. Kaole rillings gaot je over 't lief.
As ik zo terug kiek hoop ik dat je 't net zo vergiet as mij. Ik vind dat wij Grol hiel arg goed naor veuren braacht hebt. Dat wij mooie gasten hadden in 't programma. Dat Hennie en Lo 't mooi anmekaor praot hebt en dat wij slim wies mugt wezen op oes mooie dörp Grol.
Bertus Reinders
Grol, 31 december 2006
Geluudsfragmenten
Van de oetzending heb ik een CD kregen. Ik heb dizze in stukkies hakt. Niet de CD zölf vanzölf, maor wat der opstun. A'j dus meer wult beluusteren zu'j eem contact met mij opnimmen moeten. 't Hiele programma op internet zetten is wat ruumte betreft ondoenlijk. De liedties van Egbert Meijers he'k der maor niet opzet. Ie kunt aait een CD kopen. Daorentegen ku'j wel luusteren naor het lied Grolloo wat braacht weur deur Crescendo en Vriendenkring. Oh ja, alles is in het mp3-formaat en dan ok nog iens een keer hiel arg knepen, dus vanof de CD klingt 't wat helderder. Nou ja, veul plezeer der met!Opgaoveformulier, daor waor as 't met begun
't Begun eigenlieks met een mailtje van Elly Smit. Elly döt de regie veur het programma. Zij vreug of der in Grol misschien belangstelling was um met te warken an het programma Hemmeltied. Ik luuster vaok naor Radio Drenthe en kende 't programma dus wel. Eerst denk ie dan van ach, ik heb al genog te doen, maor eem laoter begunt 't toch te knaogen. 't Is misschien wel wat veur oeze beide muzikaole verenings. Now en dan begunt 't pas echt. De koppen bij mekaor. Roelie Reinders van de meziek, Wiebe Bijker van de zang en - hoe kan't ok aans - Henk Zeelenberg en ik zölf. 't Veurstel har ik al oetwarkt, dat wul zeggen, de verschillende naomen invult. Hier he'w een keuze oet maokt en achterof ku'w zeggen det 't een goeie keus west is. An de aander kaant ku'w vaststellen da'w nog wel een programma vullen kunt.